Cuando llegue la seronda
De reidores costes, 1988
Cuando llegue la seronda, cola so collecha de doraes panoyes
adornando los horros y silencios,
caleyaremos de la mano
pelos sablones ermos
que canoxen nes foles y rompientes,
y onde la gavilota solitaria
farámos compañía con alloñaos glayíos d’horizonte.
Entós, si nun tornamos la cabeza a mirar,
parecerános sentir otra vegada les voces de los ñeños
trebeyando amorosiegos al nuestru delláu
ente aquelles areñes y aquel sol.
Asina, coles manes un plizquín más apertaes,
pel ámbetu esfrecíu del caín
tornaremos andar sable ermu allantre;
diremos dexando atrás los nuestros escatafinos
que solo va enllenando la marea.
Pesa la soledá
Camín de señardaes, 1980
Pesa la soledá.
Perpesa.
Como un paxu enllenu de silencios azules,
como’l sable moyao en baxamar desierta.
Pesa la soledá.
Perpesa.
Como apalpase ún mesmu
y cincar piel ayena.
Wonderful carbayu (poema a tres manes)
Inéditu
Pa que tu teas equí, verde, enormemente verde la to garamuta,
volando tantu aire como si tu mesmu fueres l’aire;
pa que’l to tueru enllene, poderosu, la vista, dende’l pie hasta les quimes,
equí, al pie de les cases, al pie de l’acera, al pie d’esta carretera
peronde pasen miles de milentes de coches cada día,
y tu nun resistas nada más, sinón qu’espoxigues un migayín más a cada añu
y estele’l paseante col to verde trupu de fueyes como llances de nueve redondos dientes;
pa ello tuvieren que pasar munchos propietarios, foles y foles d’heriedes y más heriedes
que fueren tresmitiendo les finques en sucesión de sieglos, y, dempués, daquién que te llantó un día;
y, tresacá, de recién casi, corporaciones municipales, y nuevos propietarios,
urbanistes, parceladores y dalgún que decidiere un día conservate
como muestra d’aquel Xixón que yera nada más un puñaín de cases atropaes ente la playa y el cai,
y fuera d’esi puñaín, caseríes y praos, onde vagaben les vaques, pastiaba la reciella,
la yerba espoxigaba pa ser herba un día en tenaes y facines
y el maíz panoyaba pa ser fariña de boroña o tortu.
Sieglos y sieglos y paisanos y ñeños y muyeres patiando esi terrén y poseyéndolu,
y tu, dende que fuiste biltu, años tres años, creciendo, espolletando, resistiendo les plagues
y les seques,
la tentación de dalgún de baltate pa lleña y facer de ti lliños, colondres, trabes o estielles
de dalguna mísera foguera al borde del camín;
y, sobre too, la cabera, la más poderosa,
facer del to suelu un pedacín más d’espaciu llibre pa llevantar más cases o pa espurrir
l’alfombra de l’acera.
Déxame agora, carbayu, cabellera españada n’aire verde, xótigu pegollu de madera al cielu,
anotar na mio cartera la gracia la to imaxen, la memoria la to vida
y d’esa historia
milagrosa
qu’aporta a mi vistida de vida y de verdor viviegu.