Final
Difícil, 2017, Trabe
Colos pies somorguiaos
nel agua xelao de La Pasada
y la boca saborguiando salmoria
dexo que’l tiempu pare
pa escaecer les semeyes estrozaes
que quedaron tiraes per casa
pa escaecer que nunos pocos díes
pa tantos y tantos
nun voi ser más que povisa
espardío pela tierra.
Game Over
Caledonian Road, 2024, Trabe
El pasáu revolvióse na mio cabeza muncho más entá de lo qu’esperaba naquel viaxe.
Aquel día xinté en Candem y paré en The World’s End. Volví a escribir nuna serviyeta:
Los díes pasen veloces
llevando momentos inútiles
que nun merecen guardase
nel cantu la memoria.
Sí se caltienen aquellos díes
que vivimos peligrosamente,
aquellos onde nació la felicidá
de la mio llarguísima adolescencia.
Nun hai tanto que quixi ponelos per escrito pa cuando los díes entá vayan más rápidos.
Por eso percorrí
aquellos díes cimeros,
aquelles cais llargues y rectes,
aquelles miraes d’inocencia,
aquellos tugurios enllenos de rises,
aquelles sales con palabres inentendibles,
aquellos suaños que nun pudieron cumplise.
Los díes pasen veloces
dende l’iviernu más fríu
en qu’acabó l’adolescencia
que dalgún momentu pensé eterna.
Pero ensin ti,
yá nun tenía sentíu
siguir con aquel xuegu.
Día de fútbol
Lliteratura, 38, 2022, ALLA
Mancárala abondo, por ello enxamás-y gustó escuchar o cuntar hestories de cuando la guerra.
A los fíos delles vegaes y a los nietos poques vegaes cuntó-yos una única hestoria de toles que vivió, sufrió, oyó o pescanció naquel tiempu. El restu d’hestories de cuando la guerra prefirió guardales y intentar escaeceles.
Nel so rellatu nun s’alcordaba de por qué, cola que taba cayendo, taba aquel mediudía de branu n’El Campo, tan lloñe de casa.
La ilesia acababa de quemar aquella nueche. Dende casa viera les llaparaes de la ilesia de Llaviana quemando y, quiciabes, fuera ver si la de Podes siguía la mesma suerte. Quiciabes daquién yá-y cuntara que quemaren la ilesia.
Son dos posibilidaes que podemos garrar como verdaderes pero, en verdá, nunca sabremos si dalguna d’elles, o otres, fueren la razón pola qu’ella tuviera ellí.
Ana yera muyer de misa tolos domingos y fiesta de guardar, de rosariu diariu a la hora dormir. Yera lo que-y enseñaren en casa, lo que facíen les señores a les que sirviera. Y nun había nenguna dulda de fe por muncho que dalgún home-y intentara quitar aquellos vezos.
Y esi mediudía de branu Ana entamaba a rezar un rosariu (Pola señal de la Santa Cruz) mirando pa la ilesia de la que quedaba poco más que’l campanariu. Alredor d’ella unos guah.es (María, madre de gracia) xugaben al fútbol ayenos al ascuaral qu’había a unos pasos d’ellos, ayenos a la presencia d’Ana ellí parada marmuriando palabres inentendibles (Dios te salve, María).
Ana yá reparara nellos pero nun foi hasta que decidió volver pa casa rezando cuando se decató de que’l balón col que xugaben yera la cabeza d’un neñu Xesús (Ruega por nosotros).
Nun s’alcordaba Ana nel so rellatu de cómo depués de dexar de rezar paró’l partíu, pero sí s’alcordaba de que-yos pidió que-y dieren la cabeza, y los neños aceptaron a la primera quedar ensin balón y dexar de xugar.
Y llamentaron qu’Ana nun llegara enantes pa poder da-y el moñecu col cuerpu enteru.
Ella llamentó tola vida nun poder dir enantes aquel día hasta la ilesia, pero siempre guardó (y sigue guardando) aquella cabeza nel estoxu onde namás se guarda lo poco que quies que yá enxamás desapaeza.