Xosé Anxelu Gutiérrez Morán

Xosé Anxelu Gutiérrez Morán ye doctor en Bioloxía pola Universidá d’Uviéu (1999), depués de tener fecho’l so trabayu de tesis nel Institut de Ciències del Mar (ICM, CSIC) de Barcelona. Anguaño ye profesor d’investigación nel Centru Oceanográficu de Xixón del Institutu Español d’Oceanografía (IEO, CSIC), onde s’incorporó nel 2001. Ente’l 2014 y el 2020 foi profesor asociáu de ciencies marines na Universidá Rei Abdalá de Ciencia y Tecnoloxía (KAUST) en Thuwal (Arabia Saudina), na que siguió como profesor axuntu hasta avientu del 2024. Ye autor de más de 130 artículos científicos y d’una decena de capítulos de llibru dientro del so campu académicu, la oceanografía biolóxica y la ecoloxía microbiana marina. Como escritor n’asturianu tien publicaos los poemarios Países (Premiu Teodoro Cuesta 2004 ex-aequo, Trabe, 2005), Diversa memoria (Premiu Teodoro Cuesta 2008, Trabe, 2011), Un ciertu desorde (Premiu Xuan María Acebal 2011, Suburbia Ediciones, 2012) y Les hores de lluz (Premiu Xuan María Acebal 2023, Impronta, 2024) y el llibru de cuentos Contando colos deos (Premiu María Josefa Canellada de lliteratura infantil y xuvenil 2023, Impronta, 2024). El so cuentu Anestesia, premiáu nel V Concursu de Cuentos pola Oficialidá del Asturianu, publicóse nel volume Camín de Bimenes (Xébana Ediciones, 2008). Nel campu ensayísticu participó con «La ecoloxía microbiana marina como exemplu de cambiu de paradigma científicu» nel llibru La ciencia n’otres palabres (Coord. Xulio Viejo, Trabe, 2007). Autor tamién d’un puñáu de colaboraciones en revistes lliteraries, nel 2011 tradució al asturianu dellos poemes de los poetes estaunidenses Billy Collins y Ted Kooser pa la revista Campo de los Patos (Vol. 3, Poesía norteamerianca (primer parte), Saltadera, 2012).