[Fragmentu 1]
Über-Xana y el fugáu, 2024, Ediciones Radagast
—¡Xus! —volvió la moza a mandalu callar, esta vegada poniéndo-y la mano sobre la boca de Colás mientres agachaba nuna posición defensiva.
Unos segundos más sero, Colás pudo sentir los ruíos qu’alertaren a la roxa. Veníen d’un artu cercanu. Enantes de que pudiera descifrar a qué o quién pertenecíen una mancha de color marrón llanzóse sobre ellos. Colás zarró los güeyos y protexóse colos brazos como pudo. Cuando los volvió abrir alcontró a Diana, lluchando colo que paecía un xabaril xigante.
L’animal, del tamanu d’un güe pequeñu, taba sobre la moza mientres esta lu garraba pel pescuezu tratando d’evitar los caniles descomanaos qu’enllenaben una boca qu’esbabayaba de rabia y fame.
La bestia, si yera un xabaril, yera un xabaril mui estrañu. Non solo pol tamañu, que tamién. Tenía espines, cuasi del mesmu grosor que los caniles, que-y surdíen del llombu. Amás, el pelaxe, d’un color marrón escuru, taba cruciáu per unes franxes prietes que-y daben una traza a un animal de xungles exótiques más qu’una viesca asturiana.
Los güeyos, agora clavaos na moza, yeren d’un bermeyu sangrín y daben cuasi más mieu al probe Colás que los tarrecibles caniles colos qu’intentaba una y otra vuelta, empitonar a la roxa.
El xabaril espatuxaba, cociando a Diana nos brazos y piernes ensin qu’esta paeciera sentir nengún dolor. Poco a poco la moza foi torciendo’l pescuezu del animal énte la desesperación d’ésti qu’espatuxaba más y más fuerte. De sutaque, un ¡crac! y la bestia desplomóse sobre Diana cola tiesta nuna posición antinatural. La roxa aparto’l cuerpu quedu y púnxose de pies mientres ximelgaba les ropes pingando de babaya, fueyes y tou tipu de bichinos qu’andaben pel suelu.
—¿Ves? —dixo ufriéndo-y la mano a Colás pa lu ayudar a llevantar —díxite que tuvieres suerte d’alcontrame a min primero.
—¿Quién yes? —ye tolo que foi dicir el paisanu que nun salía del so plasmu mientres-y garraba la mano a la so salvadora.
—Yá te lo dixi. La to única esperanza de salir vivu d’esti llugar. Agora vamos, síguime. Nun tengo ganes d’engarrame con dalgo más grande.
[Fragmentu 2]
La Bastarda de Pelayu, 2023, Ediciones Radagast
Un finu orpín cayía enriba la moza. Magar que vistía una capa verde con capiellu, cola que cubría les guedeyes roxes, la tela nun yera capaz de protexela del agua. Aldonza podía sentir la humedá de la viesca na rodiya que tenía llantada en suelu. Ellí postrada poco más diba descubrir, asina que llevantó y garró les riendes de la montura. El colgante negru en forma de puñu tintinió escontra la maya de fierro, pero’l soníu nun foi quien axorizar al animal. El puñu negru yera’l distintivu, la cigua, que portaben toes y cada una de les Xanes Escures. Flavia mandóles facer en piedra d’acebache. Y repartióles ente toles muyeres al so mandu. Dicía-yos qu’había de protexeles escontra los seres malinos y los espíritus. Munches d’elles creyíen que tenía más que ver col nomatu que-yos diera la xente, les Xanes Escures.
—¿Y bien?— entrugó Lluga dende’l so caballu, mientres esperaba que la compañera de patrulla acabara de montar. Un refuelgu allumó les cares de les dos muyeres.
L’agua percorría-yos los papos y pingába-yos el pelo a pesar de los capiellos. La lluz del refuelgu dexó-yos ver claramente’l cuerpu la primer vegada.
Depués vieno’l soníu tarrecible de la trona. El caballu d’Aldonza relinchó inquietu.
—Ta como los otros —dixo Aldonza a mou de respuesta mientres afalagaba la montura pa qu’aselara.
—¿Ta zucáu dafechu? —entrugó Lluga. Con esti yá faen cuatro. Toos iguales.
—Toos iguales non —interrumpió Aldonza—. Esti ye un soldáu del emir.
—¿Un moru? ¿Equí? ¿Solu? —plasmó Lluga.
—Eso paez. Solu. Y tan secu como los otros tres —añadió Aldonza dendel caballu, mirando pal cuerpu quedu.
—Xúrote qu’esto paez obra de la Guaxa —xuxurió
Lluga afalagando la so cigua que, como la de la compañera, colingaba del pechu con una cadenina.
—¡Calla, ho!— glayó Aldonza persignándose.
—En cualquier casu hai qu’informar a Flavia —dixo Lluga tirando de les riendes del caballu, forciándolu pa dar media vuelta—. Hai dalgo o dalguién que ta dexando una riestra cuerpos secos y zucaos peles viesques. Nun creo que nin a ella nin al rei-yos faiga gracia nenguna—. Les dos empobinaron aína pal palaciu real..
[Fragmentu 3]
«La nueche del home de fueu», relatu nel llibru recopilatoriu L’horru de Vapor, 2023, Ediciones Radagast
La llegada del xuez esconsoñólu del carrusel d’imáxenes que se-y repetíen pel maxín.
—Bonos díes, Pepín —saludólu’l xuez con desinterés—. ¿Entoncies? ¿Qué foi, ho?
—Bonos díes, señor xuez —dixo solícitu l’axente—.
Ye una moza d’unos dieciséis o diecisiete. Alcontróla bien ceo pela mañana’l serenu cuando tornaba pa casa. El calabre ta… —al cabu fíxose-y un nuedu nel gargüelu y nun pudo siguir.
—¡Si? El calabre ta… ¿Qué? —entrugó xuez impaciente.
—El calabre ta estrozáu, señor xuez —dixo por fin l’axente.
—¿Qué quier dicir? ¿Estrozáu cómo?
—Ye como si un animal, una bestia xabaz, abriére-y les coraes. Ye terrible.
—Yá imaxino —añadió xuez impasible—. ¿Tamos seguros que nun foi una bestia?
—Nunca vi qu’una bestia, nin osu nin llobu, dexaren calabre igual, señor. Amás… —el cabu duldó.
—¡Amás? ¿Quier usté acabar d’una vegada col reporte? —la paciencia del xuez, poca dende l’empiezu, aportara a la llende.
—Amás, señor xuez, nun conozo de nenguna bestia que-y baxe les enagües a la presa. Nún-ylo puedo asegurar, pero puede que l’asesín copulara cola víctima enantes o depués de matala —concluyó l cabu coloráu.Tou esti casu dába-y munchu noxu y vergoña.
—Yá veo. Un asuntu enforma desagradable —el xuez, por embargu, nun paecía esmoleciu. Bien, equí nun hai muncho más que podamos facer. ¿Imaxino que’l médicu forense ta avisáu?
—Sí, señor xuez —dixo’l cabu— mandélu llamar enantes qu’a usté, señor. Tará al llegar.
—Bono, pues en cuentes écho-y un güeyu al calabre llevanto acta y marcho que tengo munches coses que facer —añadió, fríu como la mañana, el xuez ante’l plasmu del Guardia Civil.
Los dos esperaron en silenciu la llegada del médicu.