El fotógrafu Constantino Suárez fala de la seronda o una aproximación formal a la esfoyaza
Pábilun, 2025, Ultramarinos
El tiempu la seronda
yera’l de preparamos pa la muerte.
Visiones y folixa del maíz
y espectrales panoyes enrestraes
aguardando’l molín del so señor:
una partida de La Fuercia fai qu’una muyer traicione al home suyu xunta
la vía del ferrocarril,
dos mocinos atrullen nuna poza de fastíu o deséu,
procesiones, socesos y carreres caen sobre Xixón como les bombes d’otros…
La esfoyaza ye siempre pa la nueche.
Los galanes, depués,
faen compaña a les moces hasta les cases d’elles
—que siempre tán bien llonxe—
y a la mañana aprucen en trabayu.
Conciencia tranquila, Julio Romero de Torres (1897)
Pábilun, 2025, Ultramarinos
L’efectu apotropaicu ye
un mecanismu de defensa máxicu,
lo que nun significa que nun sía real
nin que’l mal nun exista.
Imaxinemos, por exemplu, un home.
Imaxinemos qu’esi home ye anarquista.
Imaxinemos que sospecha que lu van prindar al otru día,
ye dicir,
a finales del sieglu xix.
La rede clandestina ye alcuando indistinguible
de la mesma solombra que la agospia.
L’anarquista, fundíu no visiego,
l’anarquista, fundíu nuna casa que da a un monte de piornu
recompón na so mente un rostru ensin facciones
y el golor de les flores entra en cuartu como una canción desagradable:
pienses que nun ves nada pero dalgo ves, remusga.
La escuridá total, etcétera.
L’efectu apotropaicu ye:
naide puede esperar que la caña d’un árbol,
tresformada en garrote,
espollete otra vuelta y eche fueya y inda asina
l’anarquista lo espera.
La muyer y los nenos duermen na mesma cama
y cuando l’home dexa de miralos
nota cómo comiencen a fragmentase adulces
(la llibertá envolúbralos a toos como una manta
empapada qu’echamos sobre’l fueu).
L’efectu apotropaicu ye:
l’anarquista dibuxa na solombra la mázcara que gasta
y espera que los fíos nun la hereden
masque bien sabe qu’un dolor como’l de so
dura más d’una vida:
el conteníu cambia, la forma remanez.
Col amanecerín lleguen los pasos.
Sobre’l suelu de magre y espigues l’anarquista prefigura
les francíes peslleres, los papeles, la chaqueta aburuyada,
el llantu sorprendíu del críu más pequeñu.
Daquién diz un conxuru. La imaxe retrocede.
Cuando piquen en casa l’home almuerza.
Iko iko
Pábilun, 2025, Ultramarinos
La falsa primavera cai y posa posa y cai y la espinera
amuesa unes florines
de xelu ai ai ai
Como una reina infértil y fermosa posa y cai
como un cantar d’amigu entetexíu
la espínera ai ai ai
o meu amado ai ai ai
l’arbólucu xorrez mas áculla del tiempu
posa y cai
amuesa unes florines
de tiempu
ai ai ai
posa y cai
El campu estráu de blanco
sicasí
tien unos versos cuasi como riegos d’anchos
posa y cai
Unes fígures prietes con lloqueros
cubiertes con pelleyos
de probes animales muertos ai ai ai
raposos y llobatos y rebecos
posa y cai
arrastren un aráu pente la nieve
¡posa y cai!
¿Son mozos antroxaos ai ai ai?
¿La muerte embaranzada posa y cai?
¿L’úteru como tumba? ¿La espínera florida en plenu iviernu ai ai ai?
¿El tiempu que nun pasa y posa y cai?
D’esa madera fíxose esta mázcara
rapaz