Coraes
Reflexones d’un cuerpu opacu, 2020, Trabe
Siempre me lo dixisti,
nun se puede ser flor d’iviernu
porque’l fríu mata.
Tampoco (dicía yo)
se puede batallar ensin manes,
espetate’l corazón nun ganchu
y echalu al fueu.
Lleguéte a les coraes
igual que’l texu
a la boca’l muertu
pero valtaron l’árbol
y quedó secu.
Nun tendría qu’importame
porque nin soi flor nin soi fueu,
soi namás qu’un cuerpu vacíu
col espíritu rotu
y a estes altures
nin te veo nin te siento.
Cupido siempre foi malu col arcu.
De tinta
Lliteratura interna, 2016, Trabe
Solo se trata d’escribir la to historia,
d’equilibrar con tinta la balanza de la esistencia,
abarcar dalgún resquiciu d’harmonía
nel caos qu’abraza les llargues hores,
mas la dificultá a veces mora no cenciello
y la tinta se dilíe nos charcos de lluvia.
Dicho esto, que nun t’esmoleza la vida,
de tinta somos y en pallabres nos tresformaremos.
Sordos
Reflexones d’un cuerpu opacu, 2020, Trabe
De neños prestábanos lo prohibío
y díbamos hasta la playa
namás pol fechu rebecu de facelo.
El paséu yera toa una aventura,
lluchar escontra les órdenes.
La gueta d’emociones y peligros.
Si nos pillaben yéramos sordos
intentando que nun fuera con nós
y delles vegaes yéramos a consiguir
una tregua o un indultu
que nos llibraba unes hores del castigu.
Tirar p’alantre, andar, cruciar la cai.
Lo mesmo faigo agora cuando te veo,
porque nesta vida
de too s’aprende.