1.
Tiempu de render, 2010, Ediciones Trabe
But if you go carrying pictures of chairman Mao
You ain´t going to make it with anyone anyhow
Revolution.
The Beatles
Deprendimos xuntos
una llingua, quitámos-y
la nublina a esta patria.
Amamos, y ye la más profunda
les construcciones.
Na to ternura habiten
toles maneres de facer la revolución.
Les manes
Por partida doble, 2009, Ediciones Trabe
Agora escuende les manes.
Eses manes buenes de mio güela
coles que m’acariciába’l pelo too y llamábame rosa
vida, anxelín rubiu y guapu.
Eses manes.
Eses manes sabies de mio güela
que ficieron caldiu l’iviernu texendo mantes
meyores que les de cualquier Penélope, que tornaben
la pena en risa solo con dexame la caxa botones pa xugar.
Eses manes.
Güei apuntóse a un cursu d’internet
y nun quier que naide vea eses manes, diz que tan vieyes, fees, escures
de tanto trabayar na tierra.
Agora, mio güela, escuende les manes
y nun s’atreve a tocar el tecláu l’ordenador.
Y yo, tan lloñe como sigo tando de mi mesma,
nun-y digo qu’eses manes
ficiéronme creer na vida tantes veces,
nun-y digo qu’eses son les manes
más guapes que enxamás tocaren
la tierra.
Triloxía del soníu
Inéditu
I
Piensa nesi momentu previu al soníu.
¿Qué hai?
¿Qué ye lo que suena cuando
tovía nun suena nada?
Aguanta. Va sentise dientro.
Dalgo anda temblando,
y esi son nun ye como agua que marcha.
Como’l ríu, como’l tiempu.
Esi son queda yá hasta
que ruempe.
Aguanta ehí.
¿Ves que ta rompiendo?
Ta esperando pol to xestu.
Piensa nesi momentu previu al soníu.
Piensa en quién yes
cuando yá’l soníu entama.
II
Inéditu
Ye imposible que nada suene
ensin espaciu.
Fai falta aquello
pa poder exercer el movimientu.
Golpe. Golpe.
Nun esiste
ensin xestu.
Ye imposible que nada suene
ensin tiempu.
La duración ye daqué maleable
que quier dicir una cosa
o quier dicir otra
—golpe.pausa.golpe—,
nada nun esiste
ensin tiempu.
Asina quien fai’l son.
Mira a ver qué se pue facer
pa tocar
pa sentir
ensin esi espaciu,
ensin esi tiempu.
III
Inéditu
Cuánto dices qu’importa
esto de dientro.
Mira más p’allá de la guapura
d’una llingua. Mira más p’allá.
¿Eso que llames caxigalines
pienses que tará na Hestoria del Arte?
Too queda dientro casa.
Tienes cantares y dicires
mui guapos pa los guah.es.
Esti fueu tuyu
ye tan d’hormona, tien tan poca traza
d’universalidá.
Nenina, ta mui bien que pienses
dedicar el to tiempu a estes artes.
El to tiempu llibre.
El to tiempu depués de tolo que’l tiempu
tien pensao pa ti.
Nenina, faes filigranes coles palabres.
Mira a ver si nun te quiten
tiempu de lo importante.
Que naide te va nomar pol to cantar
como si fueres Lorca.
Sicasí, de muncho en muncho,
escoyemos a una de les tuyes
pa da-yos color a los llibros na escuela.
Escoyemos a una de les tuyes
pa que nun se note
esta torga diaria,
esta soga que tolos díes
pon tantes trabes pa ser voz,
pa ser quien a cantar.