Raúl Alonso García

Raúl Alonso García ye historiador pola Universidá d’Uviéu y comunicador pola Universidá de Valladolid. Como escritor tien publicao dos poemarios: Los días vividos (Ed. Camelot, 2019), una obra que narra, poema a poema, la hestoria d’amor a distancia ente dos mozos nun viaxe ente Asturies y Galicia dende’l so aniciu hasta la so fin. D’otra banda, espublizó la obra Tiempu de nós (Ed. Trabe, 2024), col qu’algamó’l Premiu Asturies Xoven de Poesía nel añu 2023. Trátase d’un poemariu qu’afonda nel pasáu, presente y futuru d’Asturies dende un puntu de vista personal, críticu con él mesmu, pero tamién dende un puntu de vista colectivu y fixándose na sociedá que lu arrodia y que viaxa per tol territoriu faciendo una posa consciente p’analizar muncho de la vida de les clases populares asturianes y conocer asina el porqué de les situaciones que se dan anguaño nel país.

Amás, tien publicao testos poéticos en dellos númberos de la revista Formientu, mesmo na so versión dixital, y protagonizó la colección fotográfica qu’ilustra’l númberu 19. Tamién colabora davezu con artículos na plataforma dixital sobre la música d’Asturies musicasturiana.com. Xunto a ello, coordina la sección Agora de noticies n’asturianu de La Voz d’Asturies y co-dirixe’l podcast cultural Héroes ensin nome xunto cola docente Yedra Riesgo, nel qu’afonda na cultura d’Asturies al traviés d’entrevistes colos sos protagonistes, diendo a los espacios donde asocede esa creación cultural y dando a conocer más de 30 proyectos culturales fechos nel territoriu.