Palestines
Palestinas. 2006, Coleutivu Milenta muyeres
Robáron-yos la tierra, el sal, l’agua. Esaniciaron les pallabres que suenen a afalagu, a besos, a sorrisa, y traxeron consigo l’odiu, la venganza, la rabiura. Estrapallaron la so dignidá y arrollaron con tanques l’arguyu. Estrizaron escueles, hospitales, xardinos, templos, cases. Valtaron la infancia, caltriando con misiles les sos miraes. Afararon los sos campos, semando velees, echaron abaxo los sos abellugos piedra a piedra y alambraron l’horizonte de los suaños. Encerraron les esperances amaniaes tres d’una muria d’impotencia, ignominia, silenciu. Por dalguna ecuación ablucante, los sos muertos nun cuenten; tráxicamente devaluaes, les sos vides nun valen un rispiu. Un llamentu perdíu nun suelu ensin vida, una ausencia infinita y aparrada, un abismu de dolor homicida añeren na so mirada.
L’asturiense
Breve Historia de Asturias, 1986, Ayalga; Historia breve d’Asturies, 2006, VTP
Ente’l 9000 y el 8000 e. C., a los grupos qu’habitaben la trabiella astur-cántabra súmense otros nuevos aportaos de fuera. Los vezos d’esti momentu previu al Neolíticu ufierten diferencies clares respectu a lo paleolítico. Por ser n’Asturies onde hai más restos localizaos, esta nueva cultura conozse col nome d’Asturiense.
Los asturienses, anque siguen siendo cazadores y recolectores, estremáronse por ser consumidores n’altu grau de mariscu y moluscos, n’especial de llámpares, bígaros, muxones, cascoxos… La fastera más poblada d’Asturies yera’l tramu de mariña que va de Ribeseya a la ría de Tinamayor (conceyos de Ribeseya, Llanes y Ribedeva). Ye ellí onde apaez la mayor cantidá de concheros de tola trabiella cantábrica.
Los concheros son grandes apilamientos de restos de mariscu, güesos d’animales y cáscares de moluscos que dexaron como güelga de la so actividá los grupos humanos de les mariñes. El litoral astur-cantábricu atrayó de siempre a la población poles sos condiciones ecolóxiques: l’averamientu de los cumales y la mar, que, amás de la so importancia como fonte de recursos, fai melgueru’l clima.
Los habitantes del periodu postglaciar caltuvieron dalgunos de los modos de vida paleolíticos, como la so vinculación a les cueves, nes que, nes entraes, suelen apaecer los concheros. La relación carne-mariscu tuvo de tar mui anivelada na dieta asturiense, que debió ser, como l’afitamientu nos recursos locales, más perfecha y segura que nunca. Nun abandonaron la caza, pero sí s’especializaron más: en cada yacimientu predominen los restos d’una especie animal enriba les otres, xeneralmente’l ciervu. Amás de marisqueros y cazadores, yeren tamién pescadores de mar y ríu.
L’aumentu de la vexetación y el cambiu de dieta incidieron nel instrumental, que tuvo de facese más grande p’afayase a les nueves necesidaes. Fixéronse aprovechando los materiales locales, la cuarcita nel nuestru casu, y abandonóse la perfección a cambiu de la utilidá. Algamaránse más metros de filu por kilu piedra qu’en dengún otru momentu, y más cortante que nunca. L’aperiu característicu d’esta industria ye’l picu asturiense, fechu d’un cantu rodáu de tamañu mediu, ovaláu, que se cute escontra una piedra pelos dos llaos llargos hasta conseguir un cabu picudu, algamando asina un filu cortante allargáu. La parte que nun se cute val pa garrar l’instrumentu cola mano o p’aguantar un palu amarráu con tires. Pa la pesca usaben anzuelos de güesu percenciellos pero efectivos: allargaos y con punta, aguantábense pel mediu y asina dexaben poner dos cebos al empar. La mayoría de los aperios domésticos, instrumentos o armes sedríen de madera, material verdaderamente abondosu. Con ello fabricaríen recipientes, armes, llances, arcos, propulsores y tamién balses, porque paez ser que los nuestros antepasaos yeren yá bonos navegantes.
Al llibru
Inéditu. Fechu pal Club de Lectura de Turón, 2010
Un amigu.
Colos sos momentos buenos
y los sos momentos malos.
A vegaes, dan ganes de comelu,
otres veces, dan de estrapallalu.
Compañeru pelegrín
de cama, de mesa, nel bolsín…
Viaxeru impenitente que nos salva
de la espera desesperanzada.
Troncu rasu de xoven ocalitu,
pomar en flor d’aroma intensu,
o carbayu vieyu y retorcíu…
De cualquier manera,
postrer cadarma d’un ser vivu,
arume de madera.
Pa ocupar el desvelu,
pa calmar la fatiga,
pa aliviar la tensión,
pa animar la comida,
pa entender meyor les coses
de la muerte y la vida…
Pa descubrir de ti lo más fondero,
sacudite la entraña,
devolvete recuerdos ya escaecíos,
voces, golores y besos d’otru tiempu.
Pa encerrate nel so aru de fierru,
y atrapate.
Pa sentir que se detién el movimientu,
desapaecen el tiempu y l’espaciu,
y vivir n’otres pieles nesos sueños.
Pa entregate, llorar y disfrutar,
reír, callate o xurar con cagamentos.
Creador de mundos sin reinu,
Olimpu de los dioses y demonios
que nun viven más allá de los tos güeyos.
Dende que lu abres nun puedes olvidalu.
Tien la llave del cofre los secretos.
Contien pallabres: l’únicu arma
que nun mata que tenemos.
Un llibru.
Y sólo hai que lleélu…