Babel
Little Babilonia, 2018, Saltadera
Yo yá taba equí
muncho enantes de tar equí
vini con cresta y una cabra en 1999
daquella l’aspersor yera un ríu y había pelos montes
madalenes
yo vini cola idea de pañales
y pastiar
yá que sintiéramos a Diego Ratón cuntar de tierres
nes que yera cielu’l suelu
nes que la propia cayida yera l’ascensión
nes que la xente yera güelo y nieto
al empar, nunca padre
o fío
veníemos a levitar
en cuantes que gravitábemos
llegamos nel momentu esactu de la historia de Babel
nel qu’entá s’entendíen los pueblos a pesar de falar
llingües distintes
entós la torre yera una poza y comunicábemonos
per aciu de fogueres que prendíemos nes llombes
y cada foguera yera una lletra
y según ardía
así falábemos
en Babel.
Rude Buda
Little Babilonia, 2018, Saltadera
Daquella nun esistía la Inglaterra
yá que si non
a Buda pintaríenlu con Martins y Bomber o una elegante
Harrington
agora Buda va y pícame en casa
a deshora
tresmutáu n’osu
panda inversu y dizme que
fiche bien
que toles esvástiques tean tachaes
nes muries
nes chapes
nes chupes
porque si non, equí
va haber osties
porque Buda tien un tercer güeyu pel que ve
a Ghandi pegándo-y a la muyer
el pasu de l’angula
a l’anguila y de l’anguila a la culiebra
de fechu
tengo visto’l tercer güeyu de Buda mirándome raro
delles veces
la última foi n’agostu na Peña de los Cuatro Xueces
el día que pañé oriéganu pelos montes y Jandro’l Prestosu
tenía la piel del color de la tierra
otra foi na Pola na fiesta de la cai San Antonio
l’añu que marcharon les lluces y piaron toos como pitinos
cuando Buda me ve nos chigres siempre paga la siguiente ronda
y a veces diz coses memorables ente tal y cual babayada
él predixo cuando me dexó la moza en 1999
que Cristian diba cortar el pelo depués de diez años de llevalo llargo
que nun baxaba’l Sporting y que la crisis
yera otra más, periódica
pela que’l capitalismu s’estructura
y Buda predixo que me reencarnaría n’animal marín
asina que merqué un barquín y ando a la cata del calamar xigante
pesco muncho y ayeri vi una chalana azul
na que baillaben rocksteady unos rapazos.
Finlandia
Entamos d’onomástica, 2024, Ediciones Trabe
De Finlandia hai que dicir
qu’a pesar de la fama igual hai más
heavies que llagos
son llargos los iviernos y el black metal
ye’l blues de los rapazos que se críen nos abetales
al norte de Könginkangas
allá a mediudía
si asoma una llugaína yá pues date
por contentu y el restu de la nueche apáñeste
col primer discu de Metálica
o tolo que depués venga
y ye xineru escuru como caliente’l vinu
nes cases de Finlandia u ponen veles a dioses nórdicos
o dioses ateos o dioses compatibles col diañu
nes cases de Finlandia los rapazos que visten de negru
quedríen ser más negros que l’árticu
y eso que mayu ponlos ciegos con tanta lluz
y la nieve multiplícalo
pero ellos siguen a lo d’ellos
son tantos como llagos
y por eso Finlandia ye negra
amás de blanca cuando quier
y nun tien color l’agua de los llagos
en Finlandia.