Viéspera del deliriu
Aldabes del olvidu, 1990, Alvízoras Llibros
Dicía nesa carta que lloró.
Al son de la seronda
y na mesa, mal-y vieno la tarde.
Nun faltó quien dixere
—baxo silenciu estrictu—
que llevaba por cuenta los barcos qu’aportaron
al so dique en díes de primavera,
los que guarden consigo de lo trupo’l paisax:
ciudaes que nun conocen los que nos queden dientro.
Ye mester consumir el bourbon
como cantar de fiesta,
valorar tolo blanco que se-y suma a la vida;
y que, muyer, llendada ente la niebla,
por más qu’agora les tardes se-y xunten no vacío,
frente por frente, va tar ella,
y qu’igual ye bastante.
Solo quería llorar
Poesía escoyida [1985- 1997], 1997, Atenéu Obreru de Xixón
Ela se matou um pouco depois de se despedir numa carta
um pouco mal escrita do banho em que chorou um pouco
antes de se despir mal deu tempo de se enxugar suspirou
um pouco abandou-se muito antes de se matar.
Martha Medeiros
Quería llorar ensin entrar en casa,
quería llorar y terminar dafechu tola tristura
y dexar per escrito como llega al ser vienres
y que lluna crecida en mes payares tien lluz d’amor
que muerre na rosada y que la va matando.
Yá de la que crecía quixo llorar,
sumise al contemplar l’agua que-y robaba
los xuegos más soñaos: l’arcilla de L’Arquera,
el mundu plastilina d’ente los sábados,
les fueyes de los fresnos qu’abellugaben niales,
el cantar de xilgueros que queda en señaldá
de la que marchen.
Por querer, siempre quería llorar;
llorar tres los postigos de la casa al llegar la nueche,
llorar como quien ri de ser feliz
y siente de secute, como sombra na piel,
l’aire de la mentira y de lo breve:
como sombra na piel.
Quier llorar esti vienres;
ensin entrar en casa quixo llorar
y poner na pesllera’l fríu que la entumez y que la tranca,
porque agora, pa encima, cuando llora
a los vienres, tien los nuedos perdíos
y los colores ciegos pa taraza-y el suañu.
Quiero llorar, sumime nos regueros de cuanto foi imposible,
llorar nel escaparín como si fora nube
entrando en casa y dicite na mesa la señal tuya,
toñada dientro mi, dende’l dolor.
Quería llorar; padre sigue tachando
la muerte que nos tien con cara d’albanciada:
mira la foto aquella de los vienres, tamizada pol sol,
y esgrana les migayes de la memoria blanca.
Tengo la certidume de que llora,
si de siempre lloró y el llantu la gobierna
bien poco-y val la risa;
sabe que llora, deprendió asina’l viaxe.
Los conocíos siempre s’espaventaron;
un poco los amigos, lo bastante.
Ella llora y ye’l fiel,
llora atada a la vida col repasu del sur.
Les dos bien lo sabemos, ye vienres, güei.
Depués de tolos vienres, quiero llorar.
Quier llorar; arrastra les llamuergues
onde quedó varada,
la tristura davezu que-y arruga la piel y señala les llendes
más p’allá de les manes, como muñones secos.
Les tardes de los vienres sé que quería llorar;
tranqué toles ventanes pa quedame con ella.
Sé bien que llora sola: nin la mar que va a ella
nin yo que la acompaño somos quien a guardala.
Seique tampoco l’agua va a ser a detenela:
va llorar mientres viva, hai bien pocos remedios
pa que-y vuelvan al alma les primeres nociones
enantes de llorar.
Al pie d’obra
Inéditu
Non esta vez nun tembles
El cuerpu rectu
l’aire na boca y esa felicidá que yes a recoyer
de les coses cencielles
mesmo del respirar
Non esta vez nun tembles
Segura mires p’arriba y retes los andamios
Non agora nun tembles
Llixeros los pies avérense a la obra
Han pasar per delantre y nun claudiquen
hai tiempu yá que marquen el compás
el so compás llibre del mieu a que te chisten
A que chisquen con palabres que nun quieres sentir
l’adolescencia blanca
la mocedá
la muyer de los trenta
la d’agora.
Non yá nun tembles
Desnudes les parés al pie la obra
yá nun sientes la culpa
Nin culpa nin vergoña
L’aire na cara
piedra pa llevantar al cielu
Al pie la obra
piedra
pa llevantar
el vuelu
Piedra
pa llevantar
el cuerpu.