Onde afuxen los paragües
La prueba del once, 2015, Saltadera
Sé que nun ye una idea nueva
—Einstein yá lo dicía—
pero insisto en qu’esiste una dimensión paralela
onde van dar toles coses qu’entraron nel bolsu
y nun volvieron salir;
onde fice tolo que m’alcuerdo perfectamente
de facer
—apagar la lluz, pesllar el coche
pagar les multes, lleer a Faulkner—
y onde vive esa xente que me saluda pol nome
y yo pienso «tengo que beber menos».
Dígote yo qu’esiste, sinón
¿d’onde diben salir estes palabres
(que yo nun dixi, repito)?
Ye esi llugar onde afuxen los paragües,
la casa cites de los calcetos solteros
y onde atropa la desmemoria la so ayalga llexítima.
Una traxedia pequeña
Lliteratura 34, 2018, Academia de la Llingua Asturiana
Del branu que lleímos Los Miserables
ya cuasi nun queda nada.
Poco a poco fui tirando
la ropa aquello que gastaba
y agora tengo cuasi’l doble nel armariu.
Nin siquiera sé dicir cuálu foi
aquel branu nel que los dos tomos
baratos
s’escorrieron pel camín ente to casa y la mía
p’al final volver a la del amu.
Agora, al ver la película
alcordéme d’aquel branu;
non solo eso, dime cuenta
de que tu supisti que Gavroche diba morrer
bastante primero que yo.
Bernauer Strasse
Díes otros, 2021, Ediciones Trabe
Traigo per dientro un pequeñu Berlín
formigueru y búnker d’una reina
déspota
Traigo per dientro un pequeñu Berlín
quiciabes haya ruines pa otros tantos
años
Traigo per dientro un pequeñu Berlín
con muries invisibles y tonelaes
d’ausencia
Traigo per dientro un pequeñu Berlín
pa facese mercáu
fiesta
arte
abellugu.