País
El llibru de les coses misterioses, 2013, Trabe
Construyir un país con andamios hasta’l cielu,
cola fachada verde y les ventanes mui blanques,
y esperances asomaes con biecu de risa;
un país de xente atrevío que duerma
en cames ensin dueños, en cuartos patentes
como camperes inmenses y fértiles,
con galeríes como cantiles al mar bravén,
y la espluma pintando nos cristales,
y el polvu manchando de cadenes los felpudos,
y regatos percorriendo escaleres emprunes,
morriendo en salones continentales
y en brañes que nun respeten dioses nin adioses;
colos trabes sólidos, que finquen los cimientos
como los perros taragañen carne
de los intrusos qu’emporquen el país;
coles cocines abiertes a los exiliaos del mundu;
un país d’inútiles, perdedores,
incapaces d’adebecer riqueces ayenes,
incapaces de suañar dormíos,
porque solo saben suañar despiertos;
un país ensin puertes pa que la xente
entre y salga llibre de pesares
y pese les consecuencies
na romana de la conciencia;
un país ensin puertes que rinchen
pol óxidu de la muerte.
Antepar, o El silenciu, de Fernand Khnopff – 1890, Musées royaux des Beaux-Arts de Belgique, Bruseles
El silenciu invisible, 2020, Trabe
D’alcuerdu con Foucault, la voluntá de verdá antroxa una voluntá de poder. El poder y el conocimientu tán venceyaos d’una manera mui fonda. Cuando les élites qu’influyen nos filos de poder deciden qué conocimientu convién abrir o cerrar a la xente, reducen les capacidaes d’insumisión de la ciudadanía (o inclusive, les capacidaes d’apoyu a les instituciones y a los sos gobernantes llegáu’l casu). ¿Y qué conocemos de verdá sobre la Verdá?
Llamo Verdá esterior (con mayúscula irónica nel sustantivu) a una noción ideal nel sentíu platónicu de los procesos de concepción, discusión y redacción de polítiques públiques, asina como los datos colos que cuntan p’argumentar dichos procesos, llevaos a cabu n’instituciones públiques, despachos, conseyos d’alministración o otros espacios públicos o privados onde se tomen decisiones d’impactu na vida de la ciudadanía. […]
El conocimientu social, como voi llamar a la información sociopolítica cola que cunta la ciudadanía nun momentu dau sobre cualesquier tema del so interés, el conocimientu social, digo, ye un discursu, una ficción con resultaos performativos. Lo que nos dexen ver del esterior. ¿Cómo se tresmite esa ficción? Al traviés de lo que podemos llamar ventana comunicacional. La información que llega a la ciudadanía sobre la toma de decisiones públiques y les razones poles que se tomen eses decisiones constituye […] un dispositivu pel que se tresmite’l conocimientu social, la ficción de la democracia lliberal.
Y quien abre la ventana y l’asitia nuna orientación determinada nun somos nosotros. Como muncho podemos escuclar pente les biligueres de la persiana dalgo de la Verdá esterior al conocimientu social […]
Mesmo que nos asomamos a una ventana p’adicar aquello qu’asocede acullá de les llendes del cristal, al mirar un cuadru contemplamos una espresión simbólica d’aquello que significa la realidá pal pintor. […]
Escribió Alain Corbin que la intensidá del ruíu, al contrario de lo que pudiéramos pensar, nun ye güei mayor de la qu’había nel sieglu XIX. La novedá asitia na «hipermediatización», esto ye, na continua conexón al barullu a la que nos somete la realidá. [El] ruíu amazcara un silenciu aínda peor, un silenciu cazurru y siniestru que nos ciega ensin avisu nin cuasi posibilidá de defensa.
Accidentes y perros
Los cuerpos celestes, 2021, Trabe
Daquella coincidió que l’hermanu menor vivía en Bärby, un pueblucu cerca d’Uppsala, y a papá despidiéranlu de la oficina por llegar borrachu a una reunión. Si Mateo coló en febreru, a tiempu pa dar clases nel segundu semestre na universidá, a mio pá echaríenlu guapamente en xunu. Con vagar per delantre pa pensar y decidir qué diba facer cola so vida, papá propunxo que fóramos hasta Estocolmo y d’ehí a Uppsala per carretera a ver a mio tíu. A lo primero sonaba como una idea mui lloca y mamá opúnxose. Dio lo mesmo. Ella tovía esfrutaba de permisu por maternidá y quedáben-y dalgunes selmanes pa volver al trabayu.
Alquilamos una furgoneta y arraquitámosla de cachivaches que mio güela supervisó por si Mateo pudiera necesitalos nel nuevu domiciliu. Nel espaciu que sobró asitiamos nosotros y los nuestros atabales: maletes, bolses con cacía y biberones pa Guillermo, lates y paquetes de comida envasao, un carrín plegáu y milenta complementos infantiles. El vehículu petardiaba nes curves y arrecendía a fritura. Los asientos amosaben abondes quemadures de pitos, manches circulares como planetes diminutos. Onde remendaren la tela salíen repuelgos y cordurones como sucos, que mancaben nel peor de los casos o dexaben regalles na ropa como mal más llevaderu. Pa rematar, estropióse’l radio-CD poco enantes d’entrar en Kiel.
[…]
Mamá y papá reñeran la nueche anterior nel motel. Tuvieran bebiendo martinis hasta la una o les dos. Oyílos discutir y llevanté a ver si Guillermo dormía nel trubiecu portátil qu’instalaren los responsables del motel. Cuando m’aseguré de que’l bebé descansaba tranquilu, averé a la puerta cerrada que comunicaba los dos cuartos. De mano nun fui quien pa esbillar les pallabres concretes que dicía caún, pero depués d’un par de minutos pescancié perriba’l motivu de la engarradiella. Sicasí, tenía la sensación de que’l fondu del resquemor que se guardaben por esa dómina respondía a razones qu’entansiquiera agora soi pa desentrellizar. Siempre albidraba que debaxo de los sos alderiques esnalaben rensíes tapecíes y, de dalguna manera, torpes. El despidu de mio padre nun-y sentara bien a mamá. Tampoco les salíes que facía dalguna nueche de sábadu. Él dicía que diba a casa los amigos a xugar a les cartes.
Esta vegada la engarrapela entamó pola cuestión del perru. […]