Héctor Pérez Iglesias

Nota biobibliográfica

Héctor Pérez Iglesias ye llicenciáu n’Historia pola Universidá d’Uviéu y trabaya como bibliotecariu na Rede de Biblioteques Municipales de Llanera.

N’español ganó’l premiu Asturias Joven de Poesía (2003) con Las tardes baldías. N’asturianu ganó los siguientes concursos: premiu de poesía Nené Losada Rico (2006) cola obra L’amarga cazumbre; premiu de poesía Teodoro Cuesta ex aequo (2007) cola obra Como crecieres tu; premiu de poesía Fernán Coronas (2009) cola obra Lo peor del bon tiempu; premiu de poesía Elvira Castañón (2009) con Aquella xente nunca sabía aú llevaben les carreteres xunta les que vivíen; premiu Llorienzu Novo Mier de Creación Lliteraria (2011) cola obra La mano vacía, y tamién foi premiáu en concursos de narrativa como Art Nalón Letras, El Portón o Concursu de Cuentos pola Oficialidá.

Los sos otros llibros publicaos son Prisión de náufragu (2006), Dende tan lloñe (2012 en versión dixital, republicada en papel en 2019) y Horizonte de socesos (2022). Tien tamién un llibru de cuentos, Desinencies (2009).

Dalgunes de les sos creaciones fueron incluyíes en diverses antoloxíes de poesía y colaboró con revistes como Reciella Malory, Formientu, El Summum, Estandoriu, Brixel y Lliteratura.

1
Horizonte de socesos, 2022, Ediciones Trabe

: aries, tauru y xéminis. L’orde
llogarítmicu en que van morriendo
les fogueres de san xuan
pelos descampaos; tamién produz
ecos el fumu. Pueo
oyer los eclipses. Una invocación encriptada,
esa apuesta cola que’l futuru dexa de ser coordenada
temporal y mídese en distancia física
como una orde d’alloñamientu. Aceptar
de l’astroloxía lo que la probabilidá
tien de salmu, queda por arder yá pocu
siliciu qu’arder, níquel; y tantos paradigmes, llei de causa
y defectos ( toles veces
que bailé ente ceniza). Colores computables,
supernova de foguéu,
el teorema del desencantu escríbese con notación
musical envede matemática pero nunca
seremos a predecir estribillos; la impunidá
d’esti dios ludópata que por supuestu
que xuega a los daos.

2
Horizonte de socesos, 2022, Ediciones Trabe

Mira la Lluna, toos esos
cráteres: cicatrices. Según dellos estudios
tienen más de 3.800 millones
d’años. Impactos de meteoritos, tantos
tantos güelpes. Ehí siguen; ensin atmósfera
nun hai erosión que los borre (…vientu,
orbayu). Dellos cuerpos tampoco
conocen yá les estaciones: pieles
ensin clima. A veces
hai llamaraes solares tan fuertes
que pueden barrer toa una atmósfera
(dalgo asina pudo pasar tamién en Marte,
dicen). Mira la Lluna.
Nun la pues ver, pero ellí sigue entá
la buelga del primeru que la pisó.

3
Horizonte de socesos, 2022, Ediciones Trabe

Trespásase’l bar onde aquella nueche
el conciertu, tapiaron les cristaleres
con fueyes de periódicu. Nada
se diz nestes noticies de nosotros.
Intento descifrar un xeroglíficu
na sección de pasatiempos. Les tos llárimes
al sentir aquella canción, l’aire fuera afinándose
na tonalidá de la to risa y esi albidru
d’otres nueches nes que la música
sonaría solo pa nosotros solos.
Hai titulares que falen del descubrimientu
de vida extraterrestre, el fichaxe
multimillonariu d’un fubolista,
otra racha inusual de temperatures
pa esta época del añu. El sol
destiñe’l papel y fai que paezcan vieyes
primicies d’estos díes. La cartelera,
esqueles, l’horóscopu y dame
cuenta de qu’entá sigo lleendo
el to signu primero que’l míu.