1
Biografíes, 2016, Saltadera
Esa muyer, de moza, paecíase a Marilyn Monroe.
Ye posible que pasiara pela cuenca minera como una actriz, que’l so pelo fora d’oru, que namorara munches veces al home equivocáu.
Agora esa muyer, que yá avieyó, va a misa tolos díes, vota a la derecha,
Odia los negros y los comunistes
Y de xuru enxamás volverá a ser equí una estrella de cine.
So madre tuvo que protexela col propiu cuerpu —duru y vieyu dende yá 1930— de les tropes mores.
So padre tuvo qu’emigrar al ríu Muni y tornó republicanu —amás de con un monín nel hombru.
Agora ella ye una fascista que va a Madrid coles manifestaciones contra l’albuertu.
Nes escursiones falanxistes les canciones enllenen de muertes los cristales de los autobuses.
Nes llargues tardes de branu aquella que foi Marilyn adormezse énte la televisión mientres pinta les uñes de color mariellu.
Podemos dicir —como ensin dulda enantes yá ficieron otros—
Que xamás foi lo guapo —si falamos d’ello d’una manera contemporánea— atributu que dixera daqué del alma:
Hitler tenía los güeyos del color del cielu,
Gramsci yera deforme.
2
El llar n’orde, 2020, Ediciones Trabe
Yo nun tengo rei.
Yo nun tengo dioses.
A soles el ser humanu na nueche ta siempre.
Gracies doi polos valles y polos ríos
Que’l destín güei me concedió.
Otres tierres, seique,
Habrá meyores.
Y bien: otros
El mal y la guerra aprecien.
Yo
De mio pá y de mio ma
La so llingua falo con amor:
Una nueche
La pallabra
La forma triste va ser
De tar siempre con ellos
Na casa infinita del Tiempu.
3
Biografíes, 2016, Saltadera
Nun quería falar de min. Llegué a soles a esti llugar
Siguiendo más el camín del azar que’l del dolor.
El tonu, solemne pero yá compañeru fiel, pa nada val
Más que pa dicivos cómo miento cuando digo: «De nada tengo mieu».
Tamién a min, como a esti valle, un ríu de norte a su me traviesa.
Asina como coles fueyes secas l’agua de vez en cuando va cubriéndose
Tamién la muerte per dalgún mar del mio cuerpu haza min navega.
Delles persones a les que-y desear el bien,
Los tópicos meteorolóxicos propios de cada estación del añu:
Quiciabes nun ye necesario más pa desplicar la razón pola que’l don hai que tener de l’allegría.
Pero nun ye la verdá lo que’l mio corazón yá busca, non.
Viaxeru soi qu’haza’l mundu mira una tarde de sol ardiente.