El volar de les palombes
Llauréu y Bitácora, 2025, Trabe
¿Visti, dacuando, volar una palomba?
Non al esnalar,
posándose tampoco:
volando,
na so plenitú,
cola galanería de dominar l’aire, cabruñando les ales na rosada
cola dignidá d’esi pescuezu verde, d’esi güeyu tuertu.
Has de mirar el volar de les palombes.
Salomé I
Llauréu y Bitácora, 2025, Trabe
Guiasti los nuesos barcos
pelos emburriones malevolentes d’Océanu
hasta los puestiquinos de freses y pescáu del contracái.
Salomé, reina de la paciencia,
punxisti les tos manes
nes redes texíes de los pescadores
y cosísti-yos un bordáu d’esmeraldes
pa que vieren los pexes que
la nuesa Victoria de Samotracia
con ales llixeres de mármol
faite d’una cárcel de vela,
un salón d’orfebrería y brea.
Salomé, primera del to nome,
bandera d’esta nave,
espía eterna del ocasu,
si nos sientes cantar
dinos:
al tornar de la Cólquide, ¿quedóte tastiu a sal?
.
Llimón
Inéditu
Podíemos ser como los dos llimones
Que cuelguen del árbol,
O quiciabes como les dos limes
Que pululen embaxo,
Verdes tovía
Como la idea de tu y yo.
Ácido, amargo,
Fuera de sitio,
Fruta destemplada,
Como la idea de ser
Tu y yo.