Fragmentu
Asturianía kitsch, 2023, Impronta
Los iconos pop representen a una sociedá o a una época determinada, colos sos valores y ideales. Con too, tán fundamentalmente marcaos pola democracia qu’imponen los gustos del pueblu, porque representen patrones culturales y manifestaciones artístiques consumíes sobre manera poles clases populares. Quier dicise, les clases baxa y media: la clase obrera. Una situación que la contrapón a la cultura alta: l’académica, la oficial, la que consumieron tradicionalmente los más poderosos y que, polo tanto, ye más elitista y escluyente. Esti procesu principió nel sieglu XIX, cola amenaza que suponía la industrialización pa les tradiciones y el folclor de los pueblos. Nesi contestu, énte l’éxodu del campu a la ciudá y el puxu de la burguesía, apareció’l costumismu como movimientu artísticu pa recoyer los vezos d’una sociedá idealizada. Primero d’eso, el sentimientu de colectividá tresmitiérase de xeneración en xeneración de manera oral, masque agora, el tresmisor mayor de cultura popular nun ye la familia, sinón internet. Con too, la cultura pop sigue surdiendo como una respuesta a la cultura oficial, porque una y otra representen estayes sociales distintes, amás de gustos y intereses distintos. A partir d’ehí, lo «popular» continúa envolviendo tolos elementos de la vida diaria, faciendo siempre que, d’una manera banal, les persones se sientan parte d’un colectivu; que tomen conciencia de que la so forma de ver el mundu y el so propiu sitiu nél componen un patrimoniu común.
Nel casu d’Asturies hubo y hai bien elementos que funciones como signos de pertenencia a esti territoriu. Los vezos, tradiciones, bailles, llingua, mitoloxía o lleendes foron preseos que construyeron la singuralidá d’un país. Sicasí, dexando’l folclore (lo tradicional), hemos reflexonar sobre los elementos que compunxeron lo popular: los productos qu’ufiertaron a los asturianos dalgo no que reflexase nun momentu determináu. Aquellos elementos iconográficos que conformaron una auténtica cultura pop astur qu’evolucionó, les más de les veces, ensin nengún tipu de control institucional. Por eso, ta marcada polo kitsch: l’arte o los oxetos qu’atraen a los gustos más populares y que, al tar fechos pal consumu masivu, ser productos baratos y producíos en masa, se difundieron con facilidá. Estos oxetos pudieron apreciase de manera irónica y humorística, porque, más allá de lo artístico o lo guapo, fixeron por tresmitir sentimientos. Quier dicise, valieron pa mostrar el deséu de ser o, polo menos, d’aparentar ser y, gracies a eso, llegaron al consumidor. Estos elementos funcionaron como un bien sustitutivu del derechu d’exercer como asturianu. Una asturianía kitsch qu’a lo llargo del últimu sieglu foi fundamental pa mantener una forma de ser. Sucedáneos d’una identidá que suponen una reflexón sobre la vida cotidiana na Asturies del sieglu XX.