Jean Genet
Teseles, 2003, Ámbitu
A Roberto Corte
Onde más ruxen les foles
ta l’escaecíu cementeriu de Larache.
Domínalu la gastada fusta colonial
d’un secu ciprés.
Toles tumbes son blanques.
Nuna d’elles, ruempe l’orde militar
una rosa remustiada.
Ellí, Jean Genet
recita un poema eternu
al vieyu sol atlánticu.
Malapenes un poco de cal
na mar infinito.
Esqueles
Teseles, 2003, Ámbitu
Punxeron dos esqueles
nel palu de la lluz.
Naide vino a quitales.
L’agua
esborronó les lletres
tarazó los nomes
y abrasó’l papel.
Cayeron embaxo.
Queden
les chinchetes
mordiendo la madera,
silencioses lápides
nel escuru corazón de la memoria.
Chinchetes.
Arrancáronles pa fin d’añu.
Qué poco costó.
Valíen –dixeron- pa poner
los cartelos del baile.
Chinchetes.
Silencioses lápides.
Claváronles a martiellu
cola enraxonada fuerza
de la mocedá.
Mancaben.
Mancaben metíes tan fondes.
Pero nin una llárima saltó
del secu palu de la lluz.
Pozu Entrego
Los monos de dúplex, 5, 2012, Papeles Mínimos
Vei equí’l castillete del Pozu Entrego.
Nunca asemeyó más brava la so figura.
Nunca más noble.
Parez ayenu al mundu, coronáu pol sol del mediudía.
Un altivu monumentu
a la memoria industrial.
Relluma
llimpiu de ferruñu y de povisa.
Puru.
Venimos a veneralu.
Y él,
apigaza indolente.
Completu. En paz.
Ensin embargu
nun mos engaña la so indiferencia.
Conocémoslu bien.
Un día y otru
yera dueñu de les vides.
Afuracó’l suelu
y les sos venes infestaron el valle.
Pantasmes terribles.
Conocía tolos nomes de la muerte: Grisú, Derrabe, Costeru.
El so turuyu
marcó tiránicu’l tiempu y el sen de les coses.
Implacable.
Segó los tallos
de tantos y tantos de los nuestros.
Venimos a veneralu
Dende la so altura
fai por mirar con güeyos de ferre
pero yá nun pué.
Dios cruel.
Apagósete la fame.
Del to reinu esto ye lo que queda:
Un castillete ensin mina
Una vía ensin trenes.