Berto García

Nota biobibliográfica

Berto García ye mayestru d’Educación Infantil y espertu en llingua asturiana.

Autor de los poemarios: Ensin otra sida (Trabe, 2005), Treslallende (Trabe, 2007) [escritu a medies con Carlos Suari], Manual contra’l vacíu (Trabe, 2008) [Premiu Fernán Coronas 2007], Cuando’l mundu debala (Academia de la Llingua Asturiana, 2011) [Premiu Llorienzu Novo Mier 2009], Inercia (Trabe, 2013), Tendal (Suburbia, 2013), Esconderite (Trabe, 2016), Origami (Impronta, 2021), Ítaca (Impronta, 2022) y Cinética (Cuatro Gotes, 2025).

Tien amás bien d’obra espardío peles revistes lliteraries del país, como: El Canciu’l Cuélebre, Lletres Asturianes, Lliteratura, Formientu, Lletres Lliterariu o Entellunu, y nes antoloxíes y obres colectives: Pa[i]saxes, Cuando la memoria fala, Mina de palabras, poemAEs, Al Horru II, El mejor poema del mundo, 2021 y El mejor poema del mundo, 2024.

Ye’l responsable de les compilaciones de poesía contemporánea n’asturianu Contra’l silenciu (Suburbia, 2014) y Surdiversu (Cuatro Gotes, 2024).

Na estaya de la lliteratura infantil fizo les tornes de los llibros: Florenta, la gata poeta (Cumio, 2007) y Les fábules de Leonardo da Vinci (Cumio, 2008).

Depués de tar na llucha
Manual contra’l vacíu, 2008, Trabe

Depués de tanta llucha
pa romper el silenciu
nun tenemos nes manes
más que nueche y orbayu
Depués de tantu tiempu
maxinando les siendes:
¿qué nos queda?
Escondenos nes nueches
a esperar el turnu.

Depués de tanta llucha
pa romper el silenciu
nun tenemos nes manes
más qu’un goxu de fumu.
Depués de tantu tiempu
picando nes puertes:
¿qué nos queda?
Llarimar nes muries.
Caltener el fuelgu.

Xugando al esconderite
Cuando’l mundu debala, 2011, Academia de la Llingua Asturiana

Metanes de la truena

solu
y
ensin paragües

xugando al esconderite
ente les piedres

―como’l tiempu―

tentando nun perdeme
baxo la lluvia
buscando ónde atechame
d’esti cielu buxu..

(Sicasí)
Esconderite, 2016, Trabe

Si m’emburries
al vacíu
déxame
(sicasí)
nes manes
[namás]
toos y caún
de los nomes
d’esi tiempu
nel que fuimos
quien
a escaecer
[de los iviernos]
el fríu.