Ponte la Concha Artedo
Inéditu
Brillaba la lluvia frente al telón prietu de la nueche, el llimpiaparabrises chirriando a destiempu cola música. Volvía a casa fantaseando con meteme na cama, nun quería nin cenar. El día fuera llargu, como toos, y desagradable, como la mayoría.
Prendí l’aire, nun se vía la carretera. Reduxe la velocidá y fue entós cuando les lluces del mio coche rellumaron escontra dalgo na oriella la ponte. Posé’l pie drechu sobro’l pedal de frenu y miré con curiosidá. Casi atravieso’l suelu pa parar. Colos cuatro intermitentes prendíos, apaguélu con priesa y tiréme fuera, la lluvia pingándome al instante.
Nun tuve tiempu pensalo, el mio cuerpu reaccionó solu. Llancéme a abrazar a la persona al otru llau la baranda, siguiendo l’impulsu l’animal que llevamos dientro.
— ¡Nun saltes! Por favor te lo pido, ¡nun saltes! — Glayé ente la tormenta, les ropes apegaes a mí.
— ¿Por qué? — Entrugó ensin xirase, moviéndose col vientu y faciéndome notar que nun diba poder col so pesu si saltaba. — Nun merez la pena esto, ¡quiero escapar!
— Por favor, nun saltes. Por favor, por favor, por favor. — Nun pudi más que repetime una y otra vegada, les piernes doloríes de facer fuercia escontra la barandiella.
El tiempu paróse pa nos, que nos movíemos namás que milímetros alantre y atrás, lluchando pa ganar a los elementos. Lluces parpadeando alrodiu nuesu, voces que veníen de tolos llaos. Unos brazos muncho más fuertes que los míos tiraron hasta posanos nel suelu la carretera, pero yo nun solté l’abrazu. Nun sé por qué, pero sintía que me diba la vida n’ello.
— Yá tas bien, vas tar bien, — dicía una médica mientres me subíen a la camilla, xiringosa nel suelu alquitrán. Yo nun soltaba l’abrazu, dolíenme los brazos pero negábame a lliberalos. Rápido, un home pinchóme nel brazu y los mios músculos relaxáronse al instante mientres vía les lluces azules reflexaes na so cabeza. Pero l’abrazu, yo, nun lu soltaba.
Nun lu diba soltar.
L’entierru
Inéditu
Escondíu ente les solombres, vi cómo s’acercaben. Cuatro figures grandes, escures, ruidoses. Golíen a sangre.
Una d’elles, la que manda, agachóse y fizo un furacu na tierra. Tiró dalgo pequeño dientro y zarrólu. La figura más grande, la que siempre metía munchu ruíu, agachóse hacia otra y entrugó-y:
— ¿Tas bien?
La otra asintió. Dalgo pasaba, dalgo raro. Golía a sangre y a muerte. La más pequeña marchó glayando.
Separtáronse al poco. La mayor entamó a dar vueltes alrodiu la casa, sacando y metiendo coses del coche, mientres la figura alta s’acercaba a mí arrastrando a la cuarta del brazu:
—Mira, esti ye l’árbol que cortemos,— anunció con arguyu. L’árbol, yera cierto, taba desfechu en suelu, medio podre de vieyu. Nun me moví, por si me sentíen, pero taben a unos centímetros namás. — ¿Quies marchar? — Un movimientu de cabeza secu y marcharon como vinieron: agarraos y sin priesa.
Sentéme tranquilu a esperar, dedicando’l tiempu a desentramar tolos golores nuevos que me llegaben flotando pel aire: golía a sangre, muerte y enfermedá.
Abrí los güeyos, yá cayera la nueche. Seliquino, acerquéme a la tierra removida. Fui destapando’l furacu col focicu hasta atopar lo qu’enterraran. Y ellí, na mesma tierra onde descansaba’l sangre los dueños de la casa…
Una rata.
Graduación
Inéditu
Do menor, acabó la canción.
Marchó’l soníu y llevó con él
los nuestros suaños. Les nuestres
fantasíes, les nuestres idees.
La ilusión d’un mundu que nin fue,
nin va ser.
Un mundu que nun ye.
Acabó la música, finó la hestoria.
Recoyemos cable y colamos, porque
yá nun hai d’aquello qu’había;
agotóse
y nun lo reponen.
Acabó la música y tamién
la vida.