Voz
Inéditu
Echábame contigo na yerba a ver,
pel branu,
cómo rescamplaba’l sol.
Allá los grillos,
penriba nós les caparines,
los saltapraos,
la espesa vacalloria
ente la mio risa infantil
y les tos palabres.
Tamién tenía nome
una planta
que de sópitu estampaba
na sorda quietú de la tarde.
Va tiempu que perdimos aquello,
que marchesti tu
cola exacta claridá del to llinguaxe.
Como la lluz d’agostu,
como l’allegría d’entós,
nel escuru
valle
otra vez s’apaga la voz de mio padre.
Toles coses son dúes
Los díes repetíos, 1989, Alvízoras Llibros
De la que’l silenciu dexábemos
esbariar sobre nós mesmos nada teníemos.
La mañana yera nuesa
abierta al sol y a la lluz del branu.
Qué más nos daba
sentar na vera’l camín
y esperar que viniera otra nueche,
col so pasu tranquilu, a buscanos.
Yá lo dixi, nada teníemos.
Nin priesa, nin calma, nin siquiera alcordanza.
Namás yéremos (xuntos y estraños)
la memoria qu’agora tenemos
o estes palabres.
Murueca
Tierra adientro, 2007, Saltadera
Equí termina’l mundu,
nos frutales valtaos
nel güertu n’abertal.
Esta tierra ye entera un gritu
de páxaru que cai.
Mira la casa ferida,
l’horru escundarmáu.
Artos y ortigues texen
silenciu nes parés.
Per equí pasó la muerte
y yá nunca naide vendrá
que llevante estes teyes,
los cabrios y les trabes,
que prenda de nuevo’l candil.
Ciarra los güeyos.
El mio corazón tamién
ye’l país más derrotáu.