Lo guapo del decayer
Anatomía d’un farfagón, 2022, Ediciones Trabe
Viviendo nes colomines de la vida
ye fácil atopar la ruina.
Hai delles caleyes y munches
nun lleven a ningún llau.
Hai portales, toos iguales,
nos que más d’una paisana
entá mantién al fíu colgáu:
ún que perdió’l tren, dicen
esi que nunca más
nun va tornar a pasar.
Bendites vecines
y probes diaños.
Pero tamién hai, pente les colomines de la vida,
restos d’un tiempu previu,
d’enantes de la barriada,
cuando tovía yera aldea
el pueblu.
D’aquel otru cuentu entá pue topase,
de cuando en vez, cadarma o cadabre
de cuadra o casa
pola naturaleza reclamada.
Y la más desfecha ye llar de sacavera
y de la más escaecida
biltarán yá de xuru trébole y cirigüeña.
Toi espiertu
Anatomía d’un farfagón, 2022, Ediciones Trabe
Toi espiertu.
Y yá nun me topo cómodu nesti envoltoriu
pero tampoco nun soi quien pa salir d’elli
escaecí cómo.
Hai dalgo removiéndoseme dientro, mui dientro
mientres duermo:
un fogonazu escuru nel maxín, fantasía,
un daqué máxico que torga lo real en coleición caótica
y que tovía sobrevive cuando espierto,
un arte mutante de solombres infinites
rellumantes.
¡Yá m’alcuerdo!
Deprendí un día cualquiera: na siesta postrera d’aquel día
suañé cambéu, suañé nuevo.
Suañé muerte y mancadura (que suel ser)
pero tamién suañé renacimientu.
Suañé que suañaba y qu’espertaba al mundiu solo a medies,
y dende entós, tolos díes lo mesmo:
suaño con españar violentamente, tou enteru,
nun millón de caparines azules y marielles;
ser aire
caleyar mecíu pol vientu frescu de la tarde
a rabiar a los gatos,
a enredar colos amantes;
ser ñube
que me lleve al monte’l mesmu vientu a recostrines
a posame en cada cantu y a zucar de toles flores,
a pintar de colorinos tolos praos qu’atope,
a vivir pelos mayaos y a morrer peles regueres;
ser ñebla
cuando espierte, tornar estranxeru na vixilia
a supervisar amaneceres,
a perde-y el mieu a la llercia,
a volveme llibre y a ser llocu,
esnalando entós perriba de min mesmu,
meyorando lo pasao por pura fuercia
de voluntá, naguaré por tar pa ti presente.
Cántame,
si t’alcuerdes de min, suerte mediante.
Gláyame,
si me ves colingando d’onde seya.
Allúmame,
si anecio pelo escuro y al debalu.
Ximiélgame,
si ye que nun te faigo casu.
Gárrame,
si tal favor me puen facer les tos manines.
Y suéltame depués onde medren catasoles
pa dir xuntos buscar más caparines.
¿Toi espiertu
o yes tu quien me ta suañando?
El fueu de los cobardes
Inéditu
Pa tiempos llocos, midíes escepcionales
y talu que siempres ye’l presente lo más lloco
güei prendí-y fueu a mio casa
de fuera pa dientro, entamando coles ventanes.
Ardieron rápido les cortines de gasa blanco
y anque toi afogándome col fumu, nun abro, tovía
nun quiero que salga.
A too esto, la povisa saltó yá pal armariu
onde les camises tán a cuadros
y prienden fueu tamién los calcetinos.
Si me doi priesa, tovía tengo tiempu de calzame
y salir a la cai vistíu de fueu encesu,
faceme ún con ello,
ser exemplu.
Pero ye que nunca nun fui exemplu, pa nada
nin tampoco quiero selo.
Yo quería ver arder el mundiu, ayeri
y anque güei toi más tranquilu
decidí entamar un fueu pequenu, modestu
—honestu y pernecesariu—
nel espaciu que llamo míu
nesti sitiu nel que duermo, de prestao,
nel que tamién suaño y nel qu’escribo, alcuando,
nel llugar onde paso mieu y ascu,
equí, onde tamién paso fame y sede,
onde me faigo una bolina cuando l’orbayu fai mugar les ganes,
onde vivo y muerro mientres cada orgasmu,
onde vivo y muerro depués y, tamién,
enantes.
Nel escenariu de les mios miseries más privaes,
onde tamién les alegríes son solo míes,
prendí —como venía cuntándote—
un filachu col fueu que tu me diste.
Amirando pa les llapes, pienso que,
cuando hasta’l mesmu hule del suelu se derrita
y les parees tean amburaes enteres
entós, y non primero,
abriré les ventanes, pa qu’entre l’aire
y selemente, solu, chamuscáu y en porrica,
metanes esti infiernu ingobernable,
llevantaréme.