L’aire
Voces juntas. Poesía en Valdediós XVII, 2019, Círculo Cultural de Valdediós
Amor mio:
del árbol del que se descolgaron yá los neños,
arrinca l’aire un corazón zarráu col mio equipaxe dientro
(eco de los ecos) que nun sabe ónde va, seique va contigo.
Entama l’aire a esparder como a escondíes
esi arume a fueu sele de branu y fueya seco,
y tropieza’l primer fríu cola primer sombra de seronda,
y al filu de la mio señaldá, ¿tu, daqué dices?
Cuando abro’l balcón y espero
de la distancia y de la nueche que me traigan
la música que quiero ensin saber porqué,
ensin saber porqué, llega l’aire.
Y, como tu, vuelve a dicime
lo mesmo que la primer vez.
Como tu, amor mio, cuando vuela,
vuela a esperame, otra vez, n’otra parte.
La primer vez que lloró na mio vida
L’aire ente la rama, 2015, Impronta Editorial
Foi la primer vez que lloró na mio vida.
(Dempués siguí cola mio infancia infinita)
La primer vez que la vi llorar
mio ma vistióse apurada
y echó a andar caleya alantre tan triste,
caminaba como una nube pequeña
y vistida de negro apegada a la tierra.
Morriere mio güela.
¡Cómo m’asustó la soledá de mio ma!
Quixi xubir como un perrín tres d’ella
el camín empináu pel que baxaba la nueche,
nun me dexaron, y quedé esperando
porque yera mio ma esa nueche la neña.
El mio dolor
En campu abiertu, 2013, Ediciones Trabe
Un día y otru
sentía’l tercu aliendu
pero tarrecía descubrir
el mio dolor.
Col tiempu
él fíxose más discretu
y acabó por dexame
vivir en paz.
Llegó a vieyu
ensin abandoname nunca
y ensin que naide
lu conociera.
Delles veces
dame por pensar
que naide
lu va despidir
cuando yo muerra.