(Ensin títulu, poema dedicáu al alzheimer )
Run, 2019, BajaMar
Cada vez hablo más con los muertos.
Rosalía de Castro
De qué valgo si nun puedo
date amor. Si yá nun yes
pa mi, nin tan siquiera recuerdu.
Fuime de poco a poco
ensin despidime,
apagóseme la lluz,
cada vez
falo más colos muertos.
Escaeciéndome’l presente
confundo la realidá
nun distingo vixilia o suañu
por muncho que tu t’esfuerces
vivo llonxe
nel pasáu
solu ellí yo m’alcuentro.
Voi tar más cuando nun tea
que tando equí ensin tar,
soi un yo que yá nun ye,
un cuerpo, soi yá nomás.
(Ensin títulu)
Bichoques, 2021, BajaMar
El mio llar
casi nun ocupa nada,
ye un espaciu pequeñín,
ellí teo yo tola mio fortuna,
los mios bienes, allegríes y penes,
el mio consuelu y l’aselu,
esa paz que me cura y me sana
de toles firíes.
Esa casa-cuerpu que nun me pertenez
a la que siempre quiero volver.
Qué más da’l nome que-y pongas.
El míu, el mio llar
tien nome de muyer.
Calma
Plizcos, 2024, BajaMar
Ruémpesme les prieses y enséñesme
a pelar sele una naranxa,
a saboriar los gaxos ún a ún.
Güel a azahar mientres t’esnudes
y apago la mio sede nos tos llabios
de carne perenne.