Verdugos nostálxicos
Galerna, 2021, Trabe
Nós.
Verdugos nostálxicos.
Separtemos
la uña y la carne
la piedra y la yedra,
nesi periodu d’éxodu mayúsculu
Respiro l’esbarrumbe
qu´escuende’l privilexiu minúsculu
onde atormentada l’ausencia
refuga, suplicante,
la promesa que fuimos.
Quixi
Inéditu
Perdurar
como un diariu silenciáu.
Vivir nes xuntures de les fueyes
esllumaes pela so tresparente epifanía.
Ser sienda
fecha tinta
mil nueches pronunciada.
Siguir y dar.
Conxugar
esi remangu inusual
de la qu´hipnotiza.
Ser mantra
abrir llendes nel to territoriu.
Asitiar nos cordales de to piel
pallabres
finísimes, dulces:
rabuñaes dende los llabios.
Ser afluente
compromisu fiel
en virtú de mil fontes.
Perdurar
na rebelde alborada
siempre viva
como dalgunes flores.
Rescamplar
Galerna, 2021, Trabe
Sigue tando enllena la carne
gafo y vivo
les coraes n’abertal
encierren violeta la moral
recueyen la esencia, la bohemia resistencia.
Con too y con eso
llegar al fondu final
que supunxo’l radical golpe
candial golpe.
Malpenes rescamplar
rescamplar más nada.